ISANG napakalaking 284 boto mula sa Mababang Kapulungan ng Kongreso noong Martes ang nagpatibay na tama ang naging desisyon ng Committee on Justice sa pagbabasura ng dalawang reklamong impeachment laban kay Pangulong Ferdinand “Bongbong” R. Marcos Jr., na malinaw na sumusuporta sa konklusyon ng panel na ang mga kaso ay kulang sa sapat na batayan at hindi karapat-dapat na ituloy.
Ayon kay Justice Committee Chairperson Jerville “Jinky Bitrics” Luistro ng Batangas, ang laki ng lamang ng boto ay hindi lamang lumagpas sa itinatakdang one-third threshold ng Konstitusyon kundi nagsilbi ring patunay ng kawastuhan ng naging paghatol ng panel.
Sa pamamagitan ng 284-botong pagpapatibay, sinabi ni Luistro na nagpadala ang Kamara ng malinaw na mensahe na tama ang naging aksyon ng justice panel—at na ang impeachment, ayon sa mga mambabatas, ay dapat manatiling isang pananggalang na konstitusyonal, at hindi isang kasangkapan para sa political theater.
“Dito sa nangyari po kanina, hindi lang po one-third, 284. Even ako’y nagulat with the 284 votes. That is overwhelming and it only shows, humbly speaking, na tama ang naging judgment ng mga justice members,” pahayag ni Luistro sa panayam sa media matapos pagtibayin ng plenaryo ang Committee Report No. 111.
Sa botong 284-8, na may apat na abstention, pinagtibay ng Kamara ang rekomendasyon ng justice panel na ibasura ang mga reklamo dahil sa kakulangan sa substansiya.
Pinagtibay ng House Plenary ang Committee Report No. 111, na isinumite ng Committee on Justice kaugnay ng House Resolution (HR) No. 746, na may pamagat na: Resolusyon sa Pagbasura ng mga Reklamong Impeachment na inihain nina Atty. Andre R. De Jesus at Liza Maza, Teodoro A. Casiño, Renato Reyes, Jr., Atty. Neri Colmenares, at iba pa laban kay Pangulong Ferdinand “Bongbong” R. Marcos, Jr.
Ayon kay Luistro, ang naturang boto ay nagpasimula rin ng isang-taong konstitusyonal na pagbabawal sa paghahain o pagtanggap ng panibagong reklamong impeachment laban sa Pangulo.
“Na-initiate po itong impeachment complaint against the President last January 26, 2026… following the ruling in Francisco v. House of Representatives, it is the referral to the Justice Committee which triggers the running of the one-year prohibition period,” paliwanag ni Luistro, at idinagdag na ipinagbabawal ang paghahain ng impeachment laban sa Pangulo hanggang Enero 26, 2027.
Nang tanungin kung maaari bang muling magsampa ang parehong mga nagreklamo sa susunod na taon gamit ang parehong alegasyon, sinabi ni Luistro na posible ito dahil hindi umabot sa pagtalakay sa merito ang panel. “I am inclined to believe na puwede, kasi wala naman res judicata… hindi naman napag-usapan in full length ang substance…” aniya, habang binibigyang-diin na anumang susunod na paghahain ay kailangang itama ang mga kakulangan na tinukoy ng komite, kabilang ang kawalan ng personal na kaalaman, kakulangan ng mga awtentikong rekord, kabiguang patunayan ang ugnayang faktwal o koneksyon, at kawalan ng personal na partisipasyon ng opisyal na maaaring ma-impeach.
Sa sesyon ng plenaryo, iginiit ni Deputy Speaker Yevgeny Vicente “Bambi” B. Emano ng Misamis Oriental na ang naging boto ay isang konstitusyonal na pagsasagawa, hindi pulitikal.
“This is not a political vote… This is a constitutional moment,” pahayag ni Emano, isang beterano ng Nacionalista Party (NP), at idinagdag na ang impeachment ay dapat hawakan nang may “disiplinadong pag-iingat at katapatan sa batas,” at hindi maaaring pasimulan batay sa hinuha, pagkakaugnay, o pangkalahatang paratang.
Nauna nang natukoy ng Justice panel na ang dalawang reklamo ay sapat sa porma ngunit kulang sa substansiya, na ipinaliwanag na ang pagiging sapat ay nangangailangan ng mga tiyak na katotohanan na sinusuportahan ng kapani-paniwalang ebidensiya na nagpapakita ng direkta at personal na partisipasyon ng respondent.
Bumoto ang komite ng 42-1, na may tatlong abstention, upang ideklarang kulang sa substansiya ang reklamo ni De Jesus, habang ang mosyon na ideklarang sapat ang reklamo nina Maza at iba pa ay natalo sa botong 7-39.
The post 284 BOTO NG KAMARA: IMPEACHMENT VS PBBM TAMA LANG NA IBASURA appeared first on Journal News Online.
